ليس دفاعاً عن حزب الله

ليس دفاعاً عن حزب الله

الاربعاء , 26 شباط / فبراير 2014 ،

ليس دفاعاً عن حزب الله Oi8vcGFub3JhbWEuYWxtYWRpbmEubmV0ZG5hLWNkbi5jb20vd3AtY29udGVudC91cGxvYWRzLzIwMTQvMDIvOTA3NDgxNzE4MzQyNzUxMjZfMzMwNjgzX2xhcmdlLmpwZw%3D%3D

ليس دفاعاً عن حزب الله Oi8vcGFub3JhbWEuYWxtYWRpbmEubmV0ZG5hLWNkbi5jb20vd3AtY29udGVudC91cGxvYWRzLzIwMTQvMDIvOTA3NDgxNzE4MzQyNzUxMjZfMzMwNjgzX2xhcmdlLmpwZw%3D%3D

عبدالرحمن جاسم
هذا المقال، هو عبارة عن ردود بالعامية على نقاش كان على صفحة أحد الأصدقاء، لن أذكر اسمه بغرض عدم التجريح به، لكن بحال وافق على النشر، لا مشكلة في الكلام أبداً، أنشره مرة أخرى على صفحتي، كي يرى الجميع، بأننا كشعب فلسطيني، واعي، مثقف وقادر على تبيان الحقيقة، وبأننا لا نشتم حزب الله ولا نحمله فوق طاقته، وفوق كل هذا نحن لا “نشنّع” عليه ونتهمه بما ليس فيه، نحن أصحاب الحق، نحن أصحاب الطريق، نحن العائدون -بإذن الله-.
النقاش جميل للغاية، وبطبيعة الأحوال يجب تفنيده، لإنه مش بس هادا الكلام خاطئ بحق حزب الله، الكلام هذا خاطئ بحقنا احنا كفلسطينيين، لإنه بيظهرنا سخيفين وبيوحي تماماً لأي مستمع وقارئ إنه ما عنا قدرة على تحليل الأشياء البسيطة والعميقة. في البداية علينا نشرح أولاً: أنا مش صديق للسيد حسن، تانياً أنا مع حزب الله بسبب مواقفه من فلسطين وبوصلته تجاهها، تالت نقطة -عني- هي إني ما بشتغل مع حزب الله، ولا باخد مصاري منهم، ولا بدي منهم أي فايدة من أيا نوع. يعني ببساطة ما حدا بيقدر يقولي -انت معهم عشان هيك عم تحكي هيك. أنا عم بحلل، ورح يكون تحليلي طويل شوي، فلكل واحد بدو يرد علي: يقرأ تحليلي بتمعن، مرة ومرتين وتلاتة بعدين يرد علي، لإنه كفلسطينيين، يفترض إنه احنا شعب منطقي، وعنده عقل وذكي. عشان هيك أيا ردود من طبيعة التخوين، والشتم والإهانات ما رح أرد عليها نهائياً، أيا ردود بتسأل نفس الأسئلة المجاب عليها كمان مش رح أرد عليها، وختاماً أيا ردود منطقية وعقلانية يرد عليها.
نبدأ ردنا، بسم الله الرحمن الرحيم. بخصوص إنه حزب الله حرس الحدود، يرد على الأمر ببساطة إنه هاي “الكذبة” استعملت وتستعمل بشكل دائم من الصحافة “المعارضة” المصرية لنظام مبارك آنذاك لتوصف الأنظمة العربية فيها، وبالتحديد نظام حماس، يعني التهمة هاي كانت أجمل تهمة تتهم فيها حماس، وفتح رجعت استعملتها باعلامها، وبالتأكيد “حماس” ما كانوا هيك، وقياس الشيء بالشيء يذكر، حزب الله مش هيك، بس اذا بدنا نغوص أكتر. شو يعني حراسة الحدود؟ يعني ببساطة انك تقوله لهادا العدو انت حر اعمل اللي بدك ياه، متل يعني على الحدود مع الأردن، هيك يعني حراسة الحدود، لكن على الحدود مع لبنان، اذا الكل بيتذكر من (كم سنة بس) تم خطف جنود من حرس الحدود، بالتالي الاسرائيلي لغاية اليوم بيتخوف من الجبهة الشمالية، وكل فترة بيغير قيادتها، لنفس السبب، واللي عنده أيا سؤال بهاي النقطة تحديداً، يراجع جريدتي معاريف وهآرتس عندهن أخبار دائمة عن الجبهة الشمالية بتقول دائماً إنها الخاصرة الرخوة “لدولة اسرائيل” وانها مقلقة بشكل دائم لرئاسة الأركان. (طبعاً هيجي هلق واحد يقولي ايه ما حزب الله منسق مع اسرائيل، بقوله الشي بالشيء يذكر، نفس الكلام بتقوله حكومة مبارك وحكومات السيسي حالياً وفتح عن حماس، المنطق هادا ما بيمشي، فغيره، أحسن).
2- منطق إنه حزب الله “بيبهدلني” كفلسطيني، وبيهيني كفلسطيني وكل هاي الصفات والجمل الكبيرة والرنانة، ايمتى أخوي حزب الله أهانك؟ وبهدلك؟ ومش عارف شو عمل؟ انت أخوي مش بلبنان؟ أنا ابن مخيمات بيروت، بعرف وبقولها على راس السطح، إنه لو حزب الله مش موجود إيه والله لكانوا مخيماتنا هلق عم يتقطعوا والناس اللي بالمخيمات يا صاحبي انت وياه غرقانين بالدم للركب، في حدا يقولي ليش؟ انا بقولكو: لانه احنا مكروهين من الجميع، الكل بلبنان ما بيبحبنا، فوق كل هادا احنا ضعاف (تذكروا اللي صار بنهر البارد) بالتالي، يعني الأحزاب والاتجاهات الأخرى بدها تقطعنا تقطيع، يعني حزب الله هو الوحيد اللي باقي حالياً ليقول ويحكي بلغة تانية، الوحيد اللي بعده بقولك الدم الفلسطيني خط أحمر. بس لأ، احنا ما بدنا، احنا بدنا نسكر عقولنا، ونسكر دينينا، ونتصرف على أساس انه حتى حليفنا الأخير بلبنان، لازم نتصارع معه ونقتله وندعس عليه. وشو بعد؟ بعد فيه انه لما يعمل شي نقوله شفت شفت انت عملت!! يا شباب، يا أصدقائي، يا اخوتي، أسهل شي على حزب الله إنه يقتلنا، صدقوني أسهل شي بالمنطق اللبناني، أسهل شي، بس هو مختار أصعب شي، اللي هو تحملنا، الشارع اللبناني كله، ومن ضمنه اكيد ناس بالشارع الشيعي، بيكرهونا، عادي يعني، احنا مش ملايكة وهم مش ملايكة. احنا يا اخوتي، بدنا نطلع عيون حزب الله ونرمي تقلنا عليه، وفوق كل هادا ما بدنا نتحمله، ونزعل منه، ونحاسبه كأنه النا ضربة لازم عليه. احنا ما النا ضربة لازم على حدا.
3- يا اخوتي احنا مش “سنية” ولا احنا “طائفة” واذا حدا خبركو هاي الخبرية بيكون “كذاب” وبيكون عم يضحك عليكو، وبس يترككوا ويفل، بيضل يضحك ويضحك ويضحك لحد ما يموت. لإنه ببساطة لما تسوي الفلسطينية طائفة صغيرة، وتساويهن “سنية” بتكون عم تدخلهن بمعركة تافهة، وبتبعدهن عن المعركة الرئيسية، “تحرير فلسطين” معركة الأمة كلها، بتروح ناحية معركة “صغيرة” بتصير بشارع ضيق. شعب بدو يحرر كل الدنيا، شعب يوم من الأيام ساعد كل ثوار العالم، شعب يوم من الأيام كانوا كل ثوار العالم يجوا يتدربوا عنده ويساعدوه (من نيكاراغوا، من الباسك، من الفيليبين، من السعودية تخيلوا كان في جبهة تحرير السعودية مثلا يوم من الأيام بترعاها الثورة الفلسطينية) باختصار: كنا كتير كبار، وعظيمين، وبنفكر كتير لبعيد، شو صار؟ ليش بدنا نصير “طائفين”، وبحياة الله ما حدا يصغرنا لمرحلة: الشيعي، ونصر اللات، والروافض وكل هاي الجمل التافهة، لإني بحب اسأله قبل ما تستعملهن: بتعرف أصلهن اللغوي؟ بتعرف ليش استعملوا؟ مين استعملهن بالتاريخ؟ مين حكاهن؟ ولا هيك بترددهن زي الببغاء؟ انا يا أخي درست وتعبت لأعرف معناهن واقولك انه أصحابهن واللي استعملوهن “خبثاء” و”وسخين” ونيتهن سيئة، انت اذا بدك تكذبني، اقرا وراجع وفتش بكل المراجع اللي بتلاقيها وناقشني بالحجة، ما تيجيني وتحكيني كلام طائفي بشع. احكوني بالمنطق.
4- ما نرمي ضعفنا على حدا، حزب الله مش شغلتنه يداوي ضعفنا ولا يخلينا نصير قوايا، بالنهاية مش شغلته، ولا دوره، هو عليه دوره اللي هو بدو يعمله، مش شغلته يتحمل “هبلنا” و”شتائمنا” و”العجائب” اللي عنا، حدا منكم شايف الفصائل والتنظيمات اللي عنا؟ حدا منكم اتطلع عليهم منيح؟ شو رأيكو؟ هيدول أحسن ولا حزب الله؟ شو؟ بحياة الله حدا يقولي؟ الدكاكين ولا حزب قوي مدرب منهجي. وقبل ما احدا يقولي وراه ايران ووراه دولة، يا احبتي، احنا كان ورانا دول، وكنا مسيطرين على لبنان، وعلى ليبيا وعلى تونس وعلى غزة(بفترات من الزمن) ومع هادا شو عاملين؟ بحياة الله شو عاملين؟ بالآخر هن عملوا المطلوب منهم بالمرتين اللي حكوا فيها: حرروا ارضهن بسنة الـ2000، صمدوا وعمروا ضاحيتهن وجنوبهن المدمرين تماماً بالـ2006، شو بدنا بعد؟ نسبهن عشانهن هيك؟ يا أخي لازم شوية خجل! بس شوية خجل بالتعامل مع الفكرة. بعدين اكرههن يا أخي، اكرههن، عادي يعني، بس بدي اذكرك بشي، الكراهية بتعمي، يعني ما بتخليك تكون منطقي. تذكر حديث الرسول(ص) بالأمر (واذا ما بتعرفه فتش عليه، سهل على الجوجل).
5- ختاماً: وبتمنى ما أكون أطلت، بس لازم اطول، عشان صاير الغلط عم يكتر وما حدا عم يشير إله، كون مع حماس، كون مع اللي بدك، واشتغل عندهم، بس ما تترك السم اللي أيا حدا بيبثه يوصل لروحك. أنا مش عم بقول كل حماس هيك، ولا بكره كل حماس، هادا خطأ ومش صح، بس في جو بحماس مخيف حالياً، زي بالجهاد كمان، في ناس هيك، خصوصاً بالاتجاهات الاسلامية الفلسطينية اللي كانت حليفة لحزب الله، في كراهية عميا، في طائفية، في حقد. ليش؟ بدكو تسألوهن، يا اخوتي أنا بدي فلسطين، وانتو بدكو فلسطين، ما حدا فينا بدو يغرق بوحل معين ولا بدو يدخل بمتاهات. دخل حزب الله بسوريا؟ عظيم انا كفلسطيني شو دخلني؟ انا كفلسطيني شو عامل لحزب الله هونيك مثلا؟ يعني هو قالي تعال اتجند معي وحارب؟ هو طالع لحاله بحاله لهونيك، لا طلع لعندي ولا اجا صوبي، شو دخلني أنا لأشتمه، وابلش بتعابير متل “ألنظام البائد” ومش عارف شو. بتكره النظام السوري؟ حلو أنا بكرهه كمان، وبعدين لليوم مطلوب منه، بس كمان ليش بدي أحاسب حزب الله على رأيه؟ ليش هو حاسبني على رأيي بكتير اشيا؟ بلا فلسفة زايدة، وخلي كل واحد فينا يقبل للآخرين ما يقبله لنفسه، هيك بتصح الأشياء، وبنرتاح كلنا. وختامه.

» دفاعاً عن المقاومة .. لا عن حماس .....بقلم سامي كليب
» دفاعاً عن قدري جميل وعلي حيدر ...ابراهيم الأمين
» العشائر الاردنية : سنحمل السلاح مع الجيش العربي السوري دفاعاً عن الاردن و سوريا
» الولايات المتحدة ترصد غواصة روسية قرب سواحلها ..وتركيا تطلب دفاعاً صاروخياً من الأطلسي على الحدود مع سوريا
» بيان الحراك الفلسطيني يتواصل دفاعاً عن سوريا : انطلاق حملة للتبرع بالدم في فلسطين المحتلة للجيش العربي السوري